LAOAG CITY – Nagballaag ni Mr. Rufino Ringor, Enforcer ti Field Enforcement Unit iti Land Transportation Office ti Region I kadagiti amin a motorista ditoy probinsia a saan pay a nakarehistro dagiti luganda.
Segun kenkuana, dagiti matiliwanda nga awan ti maipakitada nga aniaman a dokumento a mangipaneknek a naiparehistrodan ti luganda ket mapatawan ti pannusa.
Inbatadna nga apaman a matiliw dagiti naglabsing a motorista iti nasao a pagannurotan ket mamulta ken masuspenso ti driver iti uneg ti maysa a tawen.
Inlawlawagna nga awan ti pilpillienda gapu ta amin a klase ti lugan, dadakkel man wenno dagiti maibilang nga slow moving vehicles ket masapol nga inspeksionenda.
Kabayatanna, kiniddawna kadagiti motorista ti pannakikoordinarda kadagiti iwaywayatda a checkpoint ken sumurot kadagiti linteg-trapiko tapno maliklikan ti pannakaitantan ti biaheda.
