LAOAG CITY – Saanen nga agmulta ti Land Transportation Office (LTO) kadagiti motorista gapu iti naladaw a panagrehistro ken pannaka-renew ti driver’s license da tapno matulongan dagiti naapektaran iti Bagyo Kristine.
Segun kenni Land Transportation Office Chief Assistant Secretary Atty. Vigor D. Mendoza II, inaprobaran ni Transportation Secretary Jaime J. Bautista ti rekomendasionda para iti pannakaiwaksi dagiti multa.
Saklawen daytoy dagiti lugan a masapul a mairehistro ita nga Oktubre 2024 ken dagiti lisensia nga agleppas manipud Oktubre 21 agingga iti 31, 2024.
Napaatiddog met ti validity dagitoy agingga inton Nobiembre 8, 2024.
Segun ken ni Mendoza, ti sakup ti waiver of fines ket iti intero a pagilian gapu ta dandani sibubukel a pagilian ti naapektaran iti bagyo.
