LAOAG CITY – Nagpadespensar ni Jail Senior Inspector Rodel Cadpino, ti Jail Warden iti Bureau of Jail Management and Penology (BJMP) ditoy ciudad ti Laoag.
Daytoy ket kalpasan a naticket’an ti service vehicle da gapu iti panagparking na iti sango a mismo ti “No Parking” area iti ciudad ti Batac.
Inlawlawag ni Cadpino iti Bombo Radyo Laoag, adda ti balud da a napan inpacheck-up dagiti kakadwa na iti ospital iti ciudad ti Batac.
Inbatad na a basar ti palawag kenkuana ti driver ti lugan ket napan na sinaruno ti kadwa na ken saanna a napuutan a naibayag iti uneg ti ospital.
Innayon na nga iti panagsubli dagiti kakadwa na iti lugan ket naikkan dan ti citation ticket.
Inpasingked ni Cadpino a nakisarita met a nasayaat dagiti kakadwa na iti nang-ticket kadakuada ken inkari da a bayadan da ti multa da.
