LAOAG CITY – Burburtsa pay laeng ti eksakto a rason nu apay nga adda ti maysa a lugan ti DPWH 1st engineering district a naduktalan a nagtalinaed a naka-parking iti uneg ti maysa hotel ditoy siudad ti Laoag.
Nu pay kasta, iti inisyal a palawag ni District Engr. Ma. Venus Torio iti DPWH 1st engineering district, maysa nga inhinyero ti nakadesignaran ti nasao a lugan.
Inbatadna nga adda ti intulnog ti lugan a bisita iti nasao nga hotel.
Innayunna a saan nga iti uneg ti hotel ti nagyanan ti lugan ngem ketdi iti asideg laeng daytoy.
Kabayatanna, immunan nga adda dagiti naipatulod a ladawan iti Bombo Radyo Laoag nu sadino a nakaparking iti uneg ti hotel ti maysa a lugan ti DPWH 1st Engineering District ken nakalluban daytoy ti tolda ken arigna adda pay ti nangtakkob ti plaka na.
Inbunannag ni Engr. Torio a maimbestigaran a nasayaat daytoy a banag.
