LAOAG CITY – Ibilang ni Mrs. Delia Jesusa Guarino, ti Philippine Disability Furom and Advocacy, Regional Convenor a napintas ti nailungalong pakaseknan iti Persons with Disability (PWD) ken Senior Citizens ditoy ciudad.
Segun kenni Guarino, babaen iti nasao a lungalong ket mangnayon ti regta kadakuada gapo ta maikkan ti importansya ti kasasaad da nangruna ket nasakit para kadagiti PWD a matultulad ken arig na pagga-angawan ti sitwasyon da ken no dadduma ket maipost pay iti social media.
Inlawlawag na nga uray ti pannaka-imporsenate dagiti Persons with Disability ket nayun nga insulto kadakuada nga addaan ti rangkap iti bagi.
Inbatad na a saan latta a maikkat nga adda latta dagiti manguyaw wenno mangtulad iti PWD ngem babaen iti nasao nga ordinansa ket maputed ti kastoy a mapaspasamak ken masapol a maisuro kasta pay a saan a pagbutbuteng kadagiti ubbing dagitoy.
Mainaig iti daytoy, kunana a no maaprubaran ti konseho ditoy ciudad ti Laoag ti lungalong ket masapol a maipatungpal a nasayaat ken marikna dagiti tattao.
Ummuna iti daytoy, kalikagom ni Konsehal Jamie Fariñas ditoy ciudad ti Laoag babaen iti ordinansa a mapatawan ti pannusa kadagiti agpampammarang a Persons with Disability (PWD) ken Senior Citizens.
