LAOAG CITY – Adda ti pannakadismaya ni Sangguniang Panlungsod Member Bismark Quidang iti siudad ti Batac kalpasan a saan nga immanamong ti konseho a maipasa ti lungalong na a maikkan ti diskwento dagiti tricycle driver nu mapan da kadagiti gasolinaan.
Segun ken ni Quidang, kangrunaan a tarigagay na a malag-anan dagiti tricycle drivers iti gastos ti gasolina.
Inbatad na a daytoy ket kas iti maiyim-implimentar a diskwento kadagiti bus ken jeepneys.
Immuna iti daytoy, inpakaammo ni Quidang a sakbay nga indasar na ti lungalong na ket adda ti panag-saludsod na kadagiti gasolinaan ken sumagmamano kadagitoy ti nangibaga a mabalin a mapasamak ti kalikagom na a pannakaipaay ti diskwento kadagiti tricycle driver.
Kabayatanna, iti biang ni Vice Mayor Windell Chua, kunana a nu agipangato ti presyo ti petrolyo ken nu maibaba ti panaglako dagitoy ket posible a mapukawan da.
Inpetteng met ni Quidang a respetaren na ti nagbalin a desisyon ti konseho.
