LAOAG CITY – Kalikagom ti Chairman ti Committee on Tourism ditoy ciudad ti Laoag a maestablisar ti “Panagipon Festival”
Daytoy ti ordinansa nga indasar ni Konsehal Bjorn Lao kabayatan ti regular session.
Kunana nga ti “Panag ipon” ket maysa a gagangay a kultura ditoy Ilocos Norte aglalo kadagiti coastal area ditoy ciudad.
Segun kenni Lao, nupay seasonal ti ipon ket maar-aramar para kadagiti nagduduma a delicacies.
Gapo iti daytoy, inbatad na a rumbeng a bigbigen daytoy a paset iti biag dagiti Ilocano nangruna kadagiti residente ditoy ciudad ti Laoag babaen ti panakaestablisar ti “Panag ipon festival”
Nakaipalaon iti nasao nga ordinansa a maisayangkat daytoy iti maysa a lawas ken mangrugi basar iti panakaimatang ti umuna a full moon ti bulan ti Nobiembre.
Inlawlawag pay ni Lao a ti panakaimatang ti full moon ti mangipasimudaag kadagiti mangalap nga isu met ti panagruar ti ado nga ipon.
Inbatad na pay a no maaprobaran ti nasao nga ordinansa ket maisayangkat daytoy iti Metro Gabu, Lapaz ken Brgy Caoacan no sadinno karaman kadagiti maisayangkat na aktibidad ket ti bangka race ken dadduma pay.
Kabayatanna, naipasa daytoy iti maikadua a pannakaibasa na.
