LAOAG CITY – Inanunsio ti Bureau of Internal Revenue (BIR) a maipadalan iti public auction ti uppat a luxury vehicles a kukua ti pamilia Discaya.
Nakumpiskar dagiti nadakamat a lugan manipud iti St. Gerrard Construction General Contractor & Development Corporation a kukua ti nasao a pamilia.
Basar iti Bureau of Internal Revenue, maisayangkat ti auction inton Hunio 29 manipud 9:00 ti bigat agingga 12:00 ti aldaw iti Bureau of Internal Revenue National Office idiay Quezon City.
Mabalin a mangiwayat ti inspeksion dagiti prospective buyers dagiti lugan inton Hunio 23 manipud 8:00 ti bigat agingga 5:00 ti malem iti Bureau of Internal Revenue National Office Motorpool iti Diliman.
Karaman kadagiti mailako ti Mercedes-Benz Sprinter 2017, Mercedes-Benz GLS 350D AMG 2020, Range Rover LWB 2019 ken Land Rover Defender 130 S 2023.
Mapatta-patta nga umabot iti ₱26.14 million ti pakabuklan ti balor dagiti nasao a lugan nga ilako iti babaen ti “as is, where is” basis.
