LAOAG CTY – Inpakaammo ni Dr. Darwin Ranada, neonatologist iti Mariano Marcos Memorial Hospital and Medical Center iti siudad ti Batac, a maad-adal pay laeng dagiti bakuna a maitudok para kadagiti agtawen ti 15 agpababa.
Inlawlawag na nga awan pay laeng ti datos dagiti eksperto kadagiti ubbing mainaig iti panakaipadas ti bakuna gapu ta maad-adal pay laeng no mano a dose ti kasapulan para kadagiti ubbing.
Segun kenni Ranada, kadagiti agtawen iti 16 agingga iti 65 dagiti mabalin a matudukan ti COVID-19 vaccine.
Kuna na a naaprobaran laeng dagiti bakuna para iti emergency use para kadagiti nasken a mabakunaan wenno dagiti maibilang iti prayoridad.
Inbatad ni Ranada a saan unay a maapektaran dagiti ubbing iti virus gapu ta napigpigsa ti immune system da ngem kadagiti nataengan a maaddaan pay ti severe case.
Inlawlawag na a makapasar da laeng iti sintomas ti virus kas iti panaggurigor, panaguyek ken panagpanateng.
Possible pay a mangitunda ti depression kadagiti agtutubo ti nasao a virus.
Innayon ni Ranada nga adda met ti panagsukisok no sadino nga adalen da ti long-term effect ti COVID-19 kadagiti ubbing.
