LAOAG CITY – Agtultuloy a ngumatngato ti panagangkat iti gatas ken dairy products bayat a bumabbaba met ti presio dagiti international dairies no idilig iti napalabas a dua a tawen, segun iti Food and Agriculture Organization (FAO) ti United Nations.
Agarup 2.5 million metric tons (MT) ti gatas ken dadduma pay a produkto ti gatas ti mabalin a sumrek iti Pilipinas ita a tawen, a ngimmato daytoy manipud iti 2.3 million MT iti makatawen.
Kabayatanna, ti sangalubongan nga importasion ti gatas ket manamnama a dumanon iti 85.2 a milion a MT ita a tawen, a nangatngato daytoy manipud iti 84.5 a milion a MT idi 2023.
Manamnama pay ti panagngato ti importasyon idiay Mexico, Saudi Arabia, Estados Unidos, Algeria ken Japan, segun iti Food and Agriculture Organization.
Innayon ti ahensia a daytoy ket masuportaran ti panagkasapulan gapu iti nababbaba a presio ti international dairies.
Kabayatanna, manamnama a sumayaat ti food services sales iti sumagmamano a kangrunaan a pagilian nga ag-imimport iti gatas.
