LAOAG CITY – Nagballigi dagiti otoridad a nangtiliw iti dua a construction workers iti naisayangkat nga anti-illegal drug buy-bust operation iti ili ti Nueva Era.
Nabigbig dagiti suspek nga agtawen ti 39, naasawaan, construction worker ken ti agtawen ti 34, addaan ti live-in partner, construction workers ken agpada a residente iti Brgy Poblacion iti nadakamat nga ili.
Nakumpiskar iti ikot dagiti suspek ti sumuruk-kumurang a.85 grams ti maipagarop a shabu, buy bust money; drug paraphernalia, ken dadduma a personal a kagamitan dagitoy.
Malaksid kadagitoy, nakumpiskar pay iti maysa kadagiti suspek ti maysa nga unit ti revolver caliber 22mm; 16 a bala ti caliber 22 mm, ken tallo a bala para iti 12 Gauge Shotgun.
Iti agdama ket nagtalinaed dagiti suspek iti Philippine National Police iti ili ti Nueva Era ken manamnama a sumango dagitoy iti kaso a panaglabsing ti Republic Act9165 wenno Comprehensive Dangerous Drugs Act of 2002 ken ti Republic Act 10591 wenno Comprehensive Firearms and Ammunition Regulation Act.
