LAOAG CITY – Naragsak nga inpakaammo ni Engr. Rommel Batuac, ti Chief Operation iti National Irrigation Administration a nangrugin a nagapit ti Madongan River Irrigation System idinto a dagiti dadduma a sistema ket addada pay laeng iti reproductive stage.
Segun kenkuana, dumanon iti sangapulo a porsiento iti naapiten iti Madongan River Irrigation System.
Inbatadna a dagiti maapit ket dagus dagitoy a makilo ken mairekord.
Inlawlawagna a ti post-harvest activities ket naipaima metten iti Irrigators Association babaen iti agsina a Memorandum of Agreement wenno MOA.
Kunana a dagitoy ti madutukan a mangkita kadagiti agibilang, agbayo ken iti paset ti marketing.
Mainaig iti daytoy, kuna ni Engr. Batuac a nailanad iti Memorandum of Agreement a bayadan ti National Irrigation Administration dagiti mannalon ti 4.80 iti kada kilo.
Innayonna a ti 50 a porsiento a naapit nga agbalin a bagas ket alaen ti opisinada tapno ilako dagitoy kadagiti Kadiwa Centers iti 29 a pisos iti kada kilo.
