LAOAG CITY – Manarimaan ti pannaka-ipinal ti Kamara ti gakat a mangiyalokar iti komprehensibo a benepisio ken suporta para kadagiti opisyal ti barangay.
Iti panagbitla ni House Speaker Martin Romualdez iti National Convention of the Liga ng mga Barangays, kinuna ti lider ti Kamara a panggepda nga ipasa ti Magna Carta para kadagiti Barangay.
Daytoy a gakat ket sabali pay iti singasing a pagbalinen nga innem a tawen ti termino dagiti opisyal ti barangay ken matulongan ida nga agparehistro ken agbalin a miembro ti Social Security System (SSS).
Ginutigot na pay dagiti opisyal ti barangay a makipaset ken tumulong iti pannakapadur-as ti magna carta.
Kabayatanna, binigbig pay ti House Speaker ti napateg nga akem dagiti barangay officials, nangruna iti panagdur-as dagiti komunidad.
