LAOAG CITY – Nakaalan ti Php22.2-billion a pundo ti Maharlika Investment Corporation manipod iti gobierno para iti investment commitments daytoy ita a tawen 2024.
Segun ken ni Department of Budget and Management Secretary Ammenah Pangandaman, ti nasao a balor ket nababbaba no maidasig iti proposed P36.6-billion a corporate operating budget nga immunan nga insubmitir ti Maharlika Investment Corporation iti opisinada para iti fiscal year 2024 nga umuna a tawen ti operasion daytoy kas maysa nga State-run company a mangimatmaton pay ti P125-billion a sovereign wealth fund ti Pilipinas.
Inlawlawagna nga immuna a kiniddaw ti Maharlika Investment Corporation ti 60% ti P36.1-billion a dedicated fund daytoy para iti capital outlays manipod iti total planned spending-na para ita a tawen.
Mainaig iti daytoy, inbatad met ni Maharlika Investment Corporation President and Chief Executive Officer Rafael Consing Jr., ti budget ket mangipasimudaag iti gatad dagiti investment commitments daytoy ita a tawen.
Kunana a target-da a rugian ti deployment maipanggep iti proyekto a nakaipalaon iti Maharlika Investment Fund inton tawen 2025 ngem ita a tawen ket siguradoenda ti amin a commitment maipanggep daytoy a banag.
