LAOAG CITY – Inladawan ni Presidente Ferdinand Marcos Jr. iti daytoy ng aldaw ti kasangay ti ama na a ni dati presidente Ferdinand Edralin Marcos Sr. kas “rebirth” ti pagilian.
Daytoy ti rakurak na kabayatan ti panagbitla na iti seremonya a naiyuswat iti sango ti momumento ti dati a presidente iti siudad ti Batac.
Segun ken ni presidente Marcos, kalpasan ti naunday a panawen nu sadino a nagtalinaed ti pammati dagiti mangsusuporta iti ama na ket dimteng manen ti aldaw ti selebrasyon para iti daytoy.
Kuna na nga arig a naisubli dagiti ugali, pannangipateg ti serbisyo ken kinapudno nga isu met ti makitkita na a napukaw kadagiti naglabas a tawen.
Inpetteng na a napateg iti daytoy nga aldaw gapu ta malagip dagiti oportunidad a nalukatan para kadagiti amin a Pilipino.
Inbatad na a daytoy ti rugi ti panangisubli kadagiti dati a wagas iti panagserbi, panagdayaw ken panagayat nga isu ti kangrunaan nga insuro ti dati a presidente.
Kabayatanna, iti selebrasyon ti maika-105 nga anibersaryo ti kasangay ti sigud a presidente, indauloan ni Sen. Imee Marcos ti wreath laying iti siudad ti Batac kalpasan ti naiyuswat a misa.
Presente iti nasao nga aktibidad dagiti miembro ti First Family nga isuda first lady Atty. Liza Marcos ken annak da a ni Simon ken Vincent Marcos.
Nagatendar met dagiti amin a mayor iti nagduduma a siudad ken ili iti intero a probinsya, opisyal ti barangay ken dadduma pay.
