LAOAG CITY – Nagballigi dagiti kameng ti Philippine National Police a nangarestar iti maibilang nga High Value Individual iti naiyuswat nga anti-illegal drug buy-bust operation iti Barangay 10 iti ili ti San Nicolas.
Segun ken ni Police Capt. Randy Damo, ti chief of police iti nasao nga ili, naarestar a dagus ti suspek kalpasan a naglako ti maysa a sachet a naglaon ti maipagarop a shabu iti nagpammarang kas poseur-buyer.
Kuna na nga iti pannakakapkap iti suspek ket nakakumpiskar pay dagiti otoridad iti tallo a sachet a naglaon metlaeng ti maipagarop a shabu ken lima a bala ti caliber 9mm a paltog.
Inpakaammo ni Damo a ti suspek ket drug surrenderee ken sumagmamano a lawas a minonitor da sakbay nga insayangkatan dagiti otoridad ti operasyon.
Innayon na a mapatta-patta nga umabot iti sumuruk-kumurang a 10,400 a pisos ti balor dagiti naala a maipagarop a shabu manipod iti suspek.
Mainaig iti daytoy, inbatad pay ni Damo a basar pay iti panagmonmonitor da ket dumandanun payen kadagiti kaparanget nga ili ti operasyon ti nasao a suspek.
Naamoan a ti nasao a suspek ket addaan ti negosyo na a mini-grocery iti ili ti San Nicolas.
Iti agdama, nagtalinaed ti suspek iti Philippine National Police iti ili ti San Nicolas ken maisagsaganan ti kaso a maipila kontra kenkuana.
