LAOAG CITY – Naarestar ti maysa a lalaki gapu iti panaglabsing na ti Republic Act 9165 wenno Comprehensive Dangerous Drugs Act of 2002 iti ili ti Paoay.
Nabigbig ti suspek nga agtawen ti 45, awanan ti asawa ken residente iti Brgy 5, Nalasin iti nadakamat nga ili.
Segun ken ni Police Capt. Jackson Sugayen, ti chief of police iti ili ti Paoay, agarop alas-12:39 ti malem idi kalman, Setyembre 23, kabayatan nga agur-uray ni Patrolman Dennis Daguro iti waiting shed ti Brgy 2. San Roque iti ili ti Paoag para iti panangala kenkuana ni Patrolman Juguilion Sugayen ket dinamag na iti maysa a lalaki nga agtugtugaw iti concrete bench no adda ti lighter na tapno agsigarilyo.
Inbatad na a basar ken ni Daguro, iti panangala ti lalaki iti lighter iti bulsa na ket ditoy metten a naregreg ti maysa a sachet a naglaon ti maipagarop a shabu.
Gapu iti daytoy, dagus a kinemmeg ni Patrolman Daguro ti suspek kalpasan na ket intawag na a dagus iti opisina da tapno agkiddaw ti back-up.
Iti panangkapkap dagiti otoridad iti suspek ket naimatangan da Brgy Chairman Alma Jane Dafun ken Kagawad Marion Oami, kasta met dagiti kameng ti media.
Nakumpiskar iti ikot ti suspek ti dua nga heat sealed transparent plastic Sachets a naglaon ti maipagarop a shabu nga agdagsen ti .5 grams ken mapatta-patta nga agbalor ti P3,400.00; maysa a yellow lighter; maysa nga open plastic empty sachet; ken maysa a kaha ti sigarilyo nga addaan laeng ti maysa nga stick ti sigarilyo.
Naamoan a ti nasao a suspek ket maibilang kas Street Level Individual.
Iti agdama nagtalinaed ti suspek iti Philippine National Police iti ili ti Paoay kabayatan a maisagsagana ti kaso a maipila kontra kenkuana.
