LAOAG CITY – Nagballigi dagiti otoridad a nangtiliw ti maysa a lalaki iti naisayangkat nga anti-illegal drug buy-bust operation iti Sitio Maharlika iti Barangay 1, San Lorenzo ditoy ciudad ti Laoag.
Segun ken ni Police Lt. Col. Andrew Rabang, ti chief of police ditoy ciudad ti Laoag, ti suspek ket agtawen ti 40 , awanan ti asawa ken residente metlaeng iti nadakamat a barangay.
Inbatad pay ni Rabang a ti nasao a suspek ket maibilang kas Street Level Individual.
Inpakaammo ti chief of police a nakumpiskar iti ikot ti suspek ti maipagarop a shabu nga agdagsen ti sumuruk-kumurang tallo a gramo ken ti buy-bust money.
Iti agdama, nagtalinaed ti suspek iti Philippine National Police ditoy ciudad ti Laoag kabayatan a maisagsagana ti kaso a maipila kontra kenkuana mainaig iti panaglabsing iti Republic Act 9165 wenno Comprehensive Dangerous Drugs Act of 2002.
