LAOAG CITY – Inbatad ni Mayor Cresente Garcia iti ili ti Burgos a kada miembro ti pamilya ti inpaayan da ti tulong pinansyal, karaman dagiti kaipasngay a maladaga.
Inlawlawag na nga idi damo ket napagnunumoan da a kada pamilya ti maikkan ti sagdudua ribo a pisos kas tulong da kadagiti residente iti nasao nga ili kabayatan ti Enhanced Community Quarantine (ECQ) gapu iti covid-19.
Nupay kasta, kuna ti mayor a napanunot da a saan a patas kadagiti ado ti miembro ti pamilya na.
Gapu iti daytoy, nagdesisyon da a kada miembro ti pamilya ti maikkan ti saglima gasut a pisos (P500).
Innayon na nga inraman da dagiti kayyanak gapu ta ado met latta ti kasapulan da.
Inpakaammo ni Mayor Garcia a saan da pay a nabunungan amin a barangay iti ili ti Burgos ngem mangnamnama a makompleto da iti daytoy a lawas.
Binalakadan met ti mayor dagiti kailian na nga uray kada miembro ti pamilya ti inikkan da ket saanna a kayat a sawen a bingbingayen da ti gatad a maited no di ket masapol nga iprayoridad da a gatangen dagiti kasapulan da iti inaldaw iti daytoy panawen ti krisis gapu iti covid-19.
Kabayatanna, malaksid iti tulong pinansyal, inkari ni Mayor Garcia nga ikkan danto pay ti relief goods dagiti residente ken kas iti panagibunong da ti kwarta, masapol a ti kada miembro ti pamilya ti pagibasaran da ngem saan dan nga iraman dagiti kayyanak agingga iti agtawen ti tallo nga ubing.
