LAOAG CITY – Indauloan ni Pres. Ferdinand Marcos Jr. iti pananglagip ti maika-108 a birth anniversary ti amana a ni dati a Pres. Ferdinand Edralin Marcos Sr.
Segun ken ni Presidente Marcos, napateg a lagipen dagiti naaramidan ti amana kabayatan iti panagserbina kas dati a Presidente ditoy pagilian a mangipakita ti sakripisio ti maysa a Pilipino.
Inbatadna a masapul nga ilaban ti dignidad ti tunggal maysa a Pilipino.
Mainaig iti daytoy, naisayangkat ti nagduduma nga aktibidad ken programa ditoy probinsia kagiddan iti pananglagip ti maika-108 a panagkasangay ni dati a Presidente Ferdinand Marcos Sr. ita nga aldaw, Septiembre 11.
Naiyuswat ti thanksgiving mass iti Immaculate Conception Church, wreath-laying ceremony iti Marcos monument, pannakaibunong kadagiti medical equipment ken natnateng cook off iti Imelda Cultural Center iti siudad ti Batac idinto nga adda pay ti naiyuswat a thanksgiving mass iti Sta. Monica Church ken wreath-laying ceremony iti Ferdinand Edralin Marcos Memorial Monument iti ili ti Sarrat.
Naammoan nga adda pay ti maisayangkat a Literary & Arts Competition, Naruay a Panggedan; Job Fair, I Love Ilocos Norte Concert ken dadduma pay.
Kabayatanna, nagatendar iti naindaklan a programa ti first family, dati a First Lady Imelda Marcos, Irene Marcos malaksid laeng ken ni Sen. Imee Marcos.
