LAOAG CITY – Inbatad ni Police Capt. Joseph Tayaban, chief of police iti ili ti Badoc a naka-lockdown iti agdama ti Sitio Dos iti Barangay Mabusag Sur iti nasao nga ili kalpasan nga adda ti maysa a residente a nagpositibo ti covid-19.
Daytoy ket ni IN-C128, agtawen ti 23 a lalaki, maysa nga Authorized Persons Outside Residence (APOR) no sadinno nga agpapaay kas securiry guard iti East West Bank iti ili ti San Nicolas.
Inbaga ni Tayaban nga idi Oktubre 23 a nagpaswab test ti pasyente babaen iti company doctor da iti rabii ti Oktubre 24 ket naamoan da a positibo ti resulta na.
Gapu iti daytoy, nagsasarita da kadwa da ti mayor iti ili ti Badoc, kapitan ti barangay, kasta met ti Municipal Health Officer (MHO) para iti pannaka-isolate a dagus ni IN-C128 iti Barangay Hall iti Barangay Mabusag Sur.
Inpakaammo pay ni Tayaban a sakbay a dimmalan ti swab test ni IN-C128 ket naamoan da a napan nagatendar ti birthday party iti saan pay a masinunuo a lugar.
Innayon na nga iyur-uray da ti dadduma a detalye manipod iti MHO para iti pannakaiyuswat ti contact tracing ken tapno maamoan da no sadinno pay ti napnapanan na a lugar.
Agpapan ita ket saan pay nga ammo no kasanu ken nakaalaan ti pasyente ti nasao a virus.
Mainaig iti daytoy, inbaga ni Tayaban a saan pay nga ammo no kaanu nga ag-swab test ti pamilya ni IN-C128.
