LAOAG CITY – Maisayangkat ti maika-49 nga Annual General Membership Assembly wenno AGMA ti Ilocos Norte Electric Cooperative, Inc. wenno INEC mangrugi inton Mayo 31.
Mainaig iti daytoy, iyaw-awis ni Atty. Nick Malasig, Presidente ti Board of Directors ti Ilocos Norte Electric Cooperative ti panagatendar dagiti amin a Member Consumer Owners wenno MCO’s ti kooperatiba.
Inbatadna a Sabado ken Domingo iti pannakaisayangkat ti nasao a taripnong tapno maikkan ti gundaway dagiti sumsumrek ti trabaho a miembro ti kooperatiba ti gundaway a makipaset iti nasao a taripnong.
Segun kenkuana, umuna a pakaisayangkatan ti Annual General Membership Assembly iti Ilocos Norte Electric Cooperative auditorium, Barangay Suyo ti ili a Dingras intono Mayo 31 para kadagiti Member Consumer Owners iti dumaya a paset ti probinsia kas iti ili ti Banna, Carasi, Dingras, Marcos, Nueva Era, Piddig, Sarrat ken Solsona.
Inbatadna a manipud iti dumaya ket sumaruno a pakaisayangkatanna ti Bangui Municipal Auditorium, Brgy. San Lorenzo ti ili a Bangui intono Hunio primero para kadagiti Member Consumer Owners iti umamianan a paset ti probinsia kas iti Adams, Bangui, Burgos, Dumalneg ken Pagudpud.
Kunana nga inton Hunio 7 ket maisayangkat met iti Imelda Cultural Center, Barangay Valdez iti siudad ti Batac para met kadagiti Member Consumer Owners iti umabagatan a paset ti probinsia kas iti Badoc, siudad ti Batac, Currimao, Paoay ken Pinili idinto a maudi intono Hunio otso iti Ilocos Norte Centennial Arena para kadagiti Member Consumer Owners ditoy siudad ti Laoag, Bacarra, Pasuquin, San Nicolas ken Vintar.
Inlawlawagna a maiyammo iti Annual General Membership Assembly dagiti napateg nga impormasyon mainaig ti kooperatiba ken maikkan dagiti Member Consumer Owners ti gundaway a maipaayan iti nadumaduma a papremyo manipud iti Ilocos Norte Electric Cooperative.
