LAOAG CITY – Manamnama nga adda ti maipaay a maikadua a bansada ti hazard pay para kadagiti health workers.
Segun ken ni Provincial Treasurer Josephine Calajate, addan ti direktiba ni Gov. Matthew Marcos Manotoc maiyalokaran ti pondo para iti hazard pay dagiti health workers iti babaen ti magna carta law.
Inbatad na nga addan ti pakaalan ti pondo ken maiyur-uray laengen ti komputasyon manipod iti health department.
Immuna iti daytoy, addan ti naibunong nga hazard pay kadagiti amin nga empeyado ti Provincial Government of Ilocos Norte (PGIN) pakairamanan dagiti permanent, casual, job orders ken dagiti agpapaay kadagiti government hospitals.
Kabayatanna, nasurok P15.7-million manipod iti supplemental budget no. 3 ti gobierno probinsyal ti naiyalokar para iti bayad ti mandatory appropriations, covid-19 hazard pay ken inicidental expenses kadagiti nagduduma nga opisina babaen ti Provincial Appropriation Ordinance No. 25-2020 ken ti Provincial Appropriation Ordinance No. 29-2020.
