LAOAG CITY – Agtultuloy ti kaunaan a Multilateral Maritime Exercises ti Pilipinas, Amerika ken France iti paset ti West Philippine Sea nga agpaut iti uneg ti lima nga aldaw.
Paset pay laeng daytoy iti maika-39 nga iteration ti Balikatan Exercises 2024 iti nagbaetan ti Pilipinas ken Estados Unidos.
Basar iti impormasion, idi kalman ket nagsisina a timmalaw manipod iti Puerto Princesa, Palawan dagiti barko ti Philippine Navy a BRP Ramon Alcaraz ken BRP Davao Del Sur pakairamanan ti FS Vendemiaire ti French Navy ken ti USS Harpers Ferry ti United States Navy.
Amin dagitoy ket aggigiddan nga aglayag iti daya a paset ti Palawan nga agturong iti amianan iti Mindoro Strait agingga a makadanon iti West Philippine Sea no sadino a manamnama nga agisayangkatda ti nagduduma a drills kas ti gunnery exercises, maritime search and rescue ken dadduma pay.
Gagem daytoy nga ad-adda pay a patibkeren ti air ken sea defense dagiti nasao a pagilian kas panagsagsagana iti aniaman a pangta a mabalin a mapasamak iti aniaman nga oras.
Maipalagip nga immunan nga inpadamag ti Philippine Navy a naka-monitor daytoy ti panagadu ti bilang dagiti barko ti China iti West Philippine Sea kagiddan ti opisial a panangrugi ti Balikatan Exercises 2024.
Nupay kasta, mangnamnama dagitoy nga agulimek ti China ken saan daytoy nga agaramid ti aniaman nga aktibidad a mabalin a maapekataran ti panagsanay ti Pilipinas pakairamanan dagiti kaalyado ti pagilian.
