LAOAG CITY – Inrakurak ti Tindig Pilipinas nga ibabawida ti maikadua nga impeachment complaint a naipila kontra ken ni Vice President Sara Duterte idi Pebrero 2 iti House of Representatives.
Segun iti grupo, naaramid ti desision sakbay ti panangrugi ti deliberasion ti House Committee on Justice ita nga aldaw ti Lunes, Marso 2, tapno buklen ken papigsaen ti suporta iti maikatlo nga impeachment complaint nga inpila ti religious groups, padi ken abugado.
Iti rakurak ti organisasion, ipaayda ti naiget a suporta iti maikatlo a reklamo a naglaon ti kapada a nadadagsen nga alegasion ken natibker nga ebidensia kas ti inpilada tapno mapatibker ti takder ken mapaalisto ti proseso ti kaso nga agturong iti Senado kas impeachment court.
