LAOAG CITY – Manamnama a maibunong intono bigat, aldaw ti Martes Oktubre 13 ti nayun nga 40 a multi-purpose vehicle kadagiti barangay a saan pay a nakaawat iti nasao behikulo ditoy ciudad ti Laoag.
Daytoy ti inbatad ni Mrs. Mary Jane Leaño, ti Information Officer iti gobierno lokal ditoy ciudad.
Mausar dagiti nasao a behikulo no adda dagiti pasyente kadagiti nagduduma a barangay a nasken a maitaray iti ospital para iti naan-anay a pannakataming da.
Malaksid iti panangitaray kadagiti pasyente iti ospital ken mabalin pay nga usaren dagiti nasao a behikulo no adda ti emergency kas ti mapasamak a kalamidad ken dadduma pay.
Immunan nga inlawlawag ni Mayor James Bryan Alcid a saan a naggigiddan ti pannakaideliber dagiti 80 a multi-purpose vehicle a maibunong kadagiti barangay ditoy ciudad gapu ta naaddaan ti problema ti supplier.
Kabayatanna, adda metten ti immuna nga inpasa ti konseho ditoy ciudad a resolusyon a gagem na a dumalan ti panagsanay dagiti mapusgan a mangiwanwan kadagiti nasao a behikulo.
Maipalagip nga immuna a naibunong ti 40 a multi-purpose vehicle kadagiti barangay ditoy ciudad ti Laoag idi Setyembre ita a tawen.
