LAOAG CITY – Kinumpirmaran ti Makabayan bloc ken dagiti progresibo a grupo nga inawaten ti Office of the House Secretary General ti maikadwa nga impeachment complaint kontra ken ni Presidente Ferdinand Marcos Jr., kalpasan a saan a naawat iti napalabas a lawas gapu ta adda iti sabali a pagilian ni House Secretary General Cheloy Garafil.
Basar iti Makabayan, saan a nangipaay ti kasiguradwan ni Garafil no ti maikadwa a reklamo ket dagus a maipasa iti opisina ni House Speaker Faustino “Bojie” Dy III, wenno pagmaymaysaen iti imuna a petisyon sakbay nga isumitir iti plenary ti kamara de representantes.
Kagiddan iti daytoy, inpetteng manen dagiti agpanpanday linteg ti probisyon ti 1987 Konstitusyon a mangibagbaga a saan a mabalin a rugyan ti maysa nga impeachment proceeding kontra iti agpada nga opisyal iti uneg ti maysa a tawen, banag a mabalin a makaapektar iti pannagna dagiti reklamo.
Iti agdama, nagtalinaed a saan a nalawag ti sumaruno nga addang ti Kamara de representantes mainaig iti maikadwa a reklamo a naipila kontra iti presidente.
Nakatutuk ti impeachment complaint nga inyendorsar ti Makabayan bloc iti maibilang kas “BBM Parametric Formula,” maysa a pagannurutan ti Department of Public Works and Highways (DPWH) a ti kayatna a sawen ket Baselined-Balanced-Managed ken kapada ti inisyal ti presidente.
Segun iti Makabayan, maipagarop nga inusar ti nasao a formula kas pagibasaran iti panangilatang kadagiti pondo para iti imprastruktura ti ehekutibo ken Kongreso iti national budget.
Inpetteng ti grupo a daytoy met ti nagbalin a pagibasaran ti maipagarop a kickback mainaig kadagiti proyekto.
