LAOAG CITY – Limitado laeng ti nakalap nga impormasyon ti news team ti Bombo Radyo seknan ti maikalima a kaso ti COVID-19 ditoy probinsya.
Nupay kasta, nakaquarantine ti maseknan iti ili ti Bacarra ken maysa a Locally Stranded Individual (LSI).
Adda ti madakdakamat a barangay ken basar ti saanen a nagpainagan a kapitan ket awan pay ti pammilin ti LGU Bacarra ken saan a nakalockdown ti barangay da.
Kuna met dagiti maseknan nga agpapaay iti LGU ket maiyuray pay laeng no anya ti pammilin ti gobyerno probinsyal.
Naikiddaw a saan pay laeng a mairakurak ti barangay a pagnanaedan ti maikalima a COVID-19 positive.
Rumrumwar a nakasubli ti maseknan ditoy probinsya babaen ti programa a Balik Probinsya.
Saan pay a maamuan no mano nga aldawen na nakaquarantine iti ili ti Bacarra.
Immunan nga inparuk-at ti Mariano Marcos Memorial Hospital and Medical Center iti siudad ti Batac ti Advisory No. 115.
Iti paset ti statement ti ospital, adda ti dua a pasyente a naadmit idi kalman, Hunyo 30, a dagitoy ket mild suspect cases.
Ti maysa a pasyente ket negatibo iti resulta ti COVID-19 test idinto a ti maysa pay a pasyente ket positibo daytoy.
Kabayatanna, inpakaammo pay ti nasao nga hospital a mabalinen a makarwar ti immunan a naadmit a COVID-19 patient kalpasan a negatibo ti COVID-19 repeat laboratory test na.
Nalainganen ti pasyente ken nasayaaten ti kondisyon na kalpasan a nakapasa iti discharge criteria ti DOH.
