LAOAG CITY – Awan ti nagbaliwan dagiti sinarita ni Presidente Rodrigo Duterte iti maikalima nga State of the Nation Address na idi kalman.
Daytoy ti reaksiyon ni Mr. Genaro dela Cruz, mangidadaulo Alyansa dagiti Mannalon iti Ilocos Norte (AMIN) gapu ta maibilang nga awan ti nabagas a sarita ti presidente para iti pagdur-asan ti pagilian.
Saan a maikanatad para kenni dela Cruz iti karbengan dagiti tao ti nailungalong a pannakaisubli ti death penalty babaen iti lethal injection dagiti adda iti pannakainaig na iti iligal a druga wenno panaglabsing iti Comprehensive Dangerous Act of 2002.
Kuna na a karbengan ti maysa a tao nga agbiag ken nasken a maikkan ti tsansa nga agbalbaliw ti maysa a tao.
Segun kenni dela Cruz, arigen a mapaspasamak ti death penalty gapu kadagiti makunkuna nga extra judicial killings iti baet ti war on drugs ti administrasyon ni Presidente Duterte.
Para kenni dela Cruz nga iti Anti-terror law ket panangpasardeng met kadagiti oposisyon a mangipeksa iti karirikna da.
Inbatad na a naudin ti Pilipinas iti biang ti agrikultura nangruna ket ninamnama da a maidasar daytoy iti SONA na.
Kabayatanna, kuna na a saan pay a masolbar ti problema iti COVID-19 pandemic gapu ta ibilang ni dela Cruz a military ti maimpuersar imbes nga iti biang ti medical solution.
Nasken a maipatungpal ti libre a mass testing tapno maamuan dagiti residente a nagpositibo ti COVID-19 tapno insegida a mataming.
