LAOAG CITY – Nakumpiskar dagiti otoridad ti maysa homemade caliber 38 a paltog ken 13 a sachet a naglaon ti maipagarup a shabu manipud iti pagtaengan ti subject ti search warrant iti Brgy. Loing iti ili ti Piddig.
Nabigbig ti subject a ni Rommel Pablo y dela Cruz residente iti nasao a lugar.
Segun kenni Police Lt. Tolentino Eron Jr, hepe ti PNP Piddig, karaman ni Pablo iti top priority ken maikalima iti regional level daytoy.
Kuna na nga agop-operar ni Pablo kadagiti nagduduma a kaasideg nga ili kas iti Sarrat, Laoag City ken San Nicolas.
Inbatad ni Eron a namitlon a daras a natiliw ni Pablo gapu iti iligal a druga.
Inbunannag na a nabayagen nga imonmonitor da ti subject mainaig iti iligal nga aktibidad daytoy.
Maisagsaganan dagiti maipila a reklamo mainaig iti panagsalungasing iti RA 9165 wenno Comprehensive Dangerous Drugs Act of 2002 ken RA 10591 wenno iligal a panagikot ti paltog.
Naipalaon iti search warrant nga inserbi dagiti otoridad iti maipagarup a panagikot ni Pablo iti maipagarup nga iligal a druga.
