LAOAG CITY – Naitabonen ni IN-C514, lakay, agtawen ti 82, naggapu iti Hawaii ken residente iti Sitio 6 iti Brgy. 39 Pasiocan iti ili ti Bacarra.
Mainaig iti daytoy, kuna ni Brgy. Chairman Avelino Pasion iti nasao a barangay nga awan ti nagbalin a problema iti pannakaitabon ti lakay.
Inbatad na a naitabon daytoy iti maysa a pribado a kamposanto iti Brgy. Apaleng-Libtong iti nasao metlaeng nga ili.
Kuna na ni Pasion a dagiti kameng ti PNP ken Municipal Disaster Risk Reduction and Management Office (MDRRMO) nga indauloan ni Ms. Mary Joyce Robles ti nangasistir iti pannakaitabon ti lakay.
Innayun na a dagiti laeng kapamilyana ni IN-C514 ti napan nangkita ti pannakaitabon na ngem manipod iti adayo gapu kadagiti masursurot nga health protocols.
Mainaig iti daytoy, inpakaamo ti kapitan a ti nangbanbantay iti lakay idi adda pay laeng iti ospital ket naka-isolate rason nga awan ti pagdanagan dagiti kabarangayanna.
Maipalagip a nakumpirmaran a positibo iti covid-19 ni IN-C514 idi Enero 4, 2021, addaan ti sintomas ken na-admit iti ospital maibasar iti datos ti gobierno probinsyal.
Kabayatanna, ti nasao a pasyente ti maikapat a pimmusay ditoy probinsya gapu iti covid-19.
