LAOAG CITY – Napagtutulagan ti board of directors ti Ilocos Norte Electric Cooperative (INEC) ti pannakailibre dagiti makagastar laeng ti 30kwh agpababa sipud idi Marso agingga ita a bolan ti Abril.
Inbatad ni Mr. Noel Andres, ti pannakangiwat ti INEC a daytoy nga addang wenno Pantawid Liwanag Program ket paset ti panangtulong da kadagiti marigrigat nga apektado ti Enhanced Community Quarantine (ECQ) gapu iti covid-19.
Segun kenkuana, addan to ti maited nga application form kadagiti kwalipikado a manggundaway iti daytoy.
Nupay kasta, saan a karaman iti nasao a programa dagiti negosyo kas ti sari-sari store a naipagagangayen a ti laeng makonkonsumo na ket 30kwh iti kada bolan.
Inlawlawag ni Andres nga ado dagiti aktibidad da a saan a natuloy ken dagiti inyalokar da a pondo para kadagitoy ket isu ti iyalokar da para iti Pantawid Liwanag Program.
Karaman kadagiti aktibidad ti INEC a saan a natuloy gapu iti ECQ ket ti Annual General Membership Assembly (AGMA), eleksyon ken dadduma pay.
Inpakaammo pay ni Andres a mapatta-patta nga umabot ti
60 ribo a member consumers ti mabenepisyaran ken agarop 15 milyon a pisos ti abunaran ti INEC gapu iti Pantawid Liwanag Program.
