LAOAG CITY – Inpasigurado ni Marcos Mayor Antonio Mariano a maipadalan iti swab test dagiti nakapulapol dagiti dua a nagpositibo iti COVID-19 iti nasao nga ili.
Daytoy ket da IN-C64, lalaki, agtawen ti 29 ken IN-C65, babai, agtawen ti 32, agpada a naggapu iti Taguig City, Manila.
Kuna ni Mariano a nailockdown ti Sitio Peralta, Magdalena, ken Sitio Banuar iti Brgy Dacquioag ken iti Sitio Nagrebcan iti Brgy. Escoda.
Segun kenni Mariano, nagawid dagiti dua a COVID-19 positive idi Setyembre 5 ken nagdiretso da iti Mariano Marcos Memorial Hospital iti siudad ti Batac tapno agpaagas ngem dimmalan da iti swab testing.
Inbatad na a basar iti palawag, nagturong dagiti dua ditoy probinsya tapno agpaagas gapu ta napunno ti pasyente kadagiti ospital iti Metro Manila.
Inadmitir ni Mariano a saan da nga ammo no apay a nakastrek da ditoy probinsya gapu ta saan met a nagilakad dagiti kabagyan da iti ili ti Marcos kadagiti kasapulan a dukomento gapu ta a saan a residente dagiti positibo iti nasao nga ili.
Inlawlawag ni Mariano a ti kangrunaan a nakapulapol dagiti dua a positibo ket dagiti kabagyan da ken dagiti driver ti ambulansya a nagluganan da.
Kuna na nga inawis ti maysa a kabagyan dagiti driver a mangan iti Brgy. Dacquioag kalpasan na ket nagawid dan idiay Taguig City.
Nagtalinaed dagiti dua a positibo iti ospital para iti ranta da nga agpaagas gapu ta adda ti bukol ti maysa kadakuada.
Innayon ni Mayor Mariano a nailockdown dagiti nasao sitio gapu iti panagturong dagiti close contact dagiti driver kadagitoy a lugar.
