LAOAG CITY – Binallaagan ni Presidente Bong Bong Marcos Jr. dagiti amin a botante nga agpili ti nasayaat iti Barangay ken Sangguniang Kabataan Election.
Segun iti Presidente, importante nga agpili dagiti botante nga addaan ti nasayaat a gagem iti barangay gapo ta dagitoy ti pagkamangan dagiti inaldaw.
Inpaganetget ti Presidente a saan nga agpasulang iti sangkabassit a gatad para laeng iti botos.
Mainaig iti daytoy, inbatad ti presidente nga adda dagiti dimmanon kenkuana a reports seknan iti panaggatang ti butos uray ditoy Ilocos Norte.
Kunana a kalpasan a naamoan na dagitoy ket dagus a binilin na dagiti kameng ti pulisya ken Commission on Elections tapo agturong kadagiti nadakamat a lugar.
Kabayatanna, itay bigat ket nagbutos ti presidente iti Mariano Marcos Memorial Elem. School iti Barangay Lacub iti ciudad ti Batac.
Kadua ti presidente ni Cong. Sandro Marcos no sadinno ket naiget ti naipaay a seguridad.
Nagbutos met iti Calayab Elem. School da Cong. Sandro, dagiti dua pay a kabsat na ket ni First Lady Liza Araneta Marcos idinto a ni Sen. Imee Marcos ket nagbutos iti Cabeza Elem. School ditoy ciudad ti Laoag.
