LAOAG CITY – Inbatad ni Brgy. Chairman Markus Agudelo iti Brgy. Ngabangab iti ili ti Pasuquin a saan pay a masinunuo ti kabuklan a gatad ti dinespalko a kwarta ti barangay treasurer.
Inlawlawagna nga adda ti 25,000 a ribo a naala manipod iti pondo ti barangay a maipaay a sweldo dagiti nagtrabaho iti proyekto ti barangay idi 2020.
Nu pay kasta, kuna na a saan a nait-ited ti sweldo kadagiti nagtrabaho.
Malaksid iti daytoy, kuna na nga adda ti agarup 15,000 a pisos a nausar idi piyesta ti barangayda idi 2019 pakairamanan ti honorarium ti saan a naited-ited kadagiti opisyal ti barangay.
Immuna iti daytoy, inpakammo ti kapitan nga addan dagiti dati nga iregularidad iti barangay da idi simmublat kas kapitan iti Brgy. Ngabangab.
Kabayatanna, inpetteng na nga awan ti pannakainaig na iti panagdispalko ti kwarta ti barangay.
Innayun na a matratar a naimbag ti nasao a banag tapno maamoan ti pakadagupan ti nadispalko a kwarta ti barangay.
Kabayatanna, inlawlawag ti treasurer iti Brgy. Ngabangab iti ili ti Pasuquin ti maipagarup a panagdispalko na ti kwarta ti barangay.
Kuna ti treasurer a pudno nga adda ti nakaot na a kwarta ti barangay iti kallabes.
Nu pay kasta, inbatad na a sidadaan a mangisubli iti daytoy nu pay saanna nga inbuksilan ti total a kantidad ti nabulod na a kwarta ti barangay.
Immunan nga inbaga ti barangay treasurer nga addan nagturong a kameng ti Commision on Audit kenkuana ken dita a kumpleto met ti naipakita na a dokumentos ti barangay.
Inpakaammo na a ti laeng saan a nalukib ket ti dokumento ti maysa a proyekto gapu ta mapukpukaw daytoy.
