LAOAG CITY – Saan a maliklikan iti pannakaidasar ti isyu seknan ti maipagarup a ghost delivery iti Laoag City General Hospital.
Daytoy ket gapu iti panagintood ni Vice Mayor Vicentito Lazo kadagiti mangimanmaniher iti nasao nga ospital kangrunaan kenni Mr. Ferdinand Tungpalan, administrative officer ti LCGH, mainaig ti budget deliberation ti LCGH.
Rumrumwar nga adda dagiti saan a naideliber nga agas para iti ospital ngem nabayadan sipud idi tawen 2020.
Inbatad ni Lazo a naduktalan da nga addaan ti ghost delivery kadagiti agas nga agbalur ti nasurok 100 a ribo a pisos, sumagmamano a bulan ti napalabas.
Nasaludsod kadagiti maseknan agraman kadagiti dati a mangiwanwanwan iti ospital seknan ti nasao nga isyu.
Segun kenni Lazo, kinumpirmaran met dagiti maseknan nga adda ti ghost delivery kadagiti agas itay kallabes.
Kuna na nga idi kuma adda ti napamasak a ghost delivery ket rumbeng a mapatawan ti maiyannatop a pannusa dagiti adda ti pannakainaig na iti nasao nga isyu.
Inlawlawag ni Lazo a naawagan ti ghost delivery dagiti simmangpet nga agas gapu ta nabayadan ti 100 a porsiento nupay saan a kumpleto dagiti naideliver nga agas, no sadinno nga adayo iti inbatad ni Mr. Tungpalan nga undelivered dagiti agas.
Inlawlawag met ni Tungpalan nga undelivered dagiti agas gapu ta iti baet a matawtawagan ti supplier ket adda dagiti rason da no apay a saan a naideliver a dagus dagiti agas.
Inbatad na a nabayadan dagiti agas gapu ta adda ti napirmaan nga acceptance report ken rumrumwar nga iti biang ti General Services Office ti nagpirma iti nasao a dukomento.
Kuna ni Tungpalan a saan nga isuda ti nangiprosesso ti pinagbayad kabayatan ti pannakaideliver dagiti agas.
Innayon na nga idi naireport kenkuana nga adda dagiti saan a naideliber nga agas ket binilin na ti Central Supply Room a tawagan da ti supplier.
Saan met a masinunuo no anya nga agas dagiti naideliver ngem maipan iti parmasya ti ospital.
Maituloy ti budget deliberation ti LCGH intono Martes.
