LAOAG CITY – Maob-obserbaran ti biktima ti pammaltog iti Mariano Marcos Memorial Hospital and Medical Center iti siudad ti Batac kalpasan a natamaan ti bala ti paltog ti ulo na.
Napasamak ti pammaltog iti paset ti merkado publiko iti nasao a siudad ken asideg laeng iti kuerpo ti pulisya.
Segun kenni Police Major Artemio Clemente, deputy chief of police iti PNP Batac, love triangle ti inisyal a motibo ti pammaltog kalpasan a nakasarita na ti suspek a ni Francisco Saclamitao Jr y Acapuyan, agtawen ti 44, naasawaan, construction worker ken residente iti Brgy. Santarita iti ili ti Paoay.
Binigbig ni Clemente ti biktima a ni Eduardo Honor y Olindan, agtawen ti 49, ken residente iti Brgy. 18, Magnuang iti nasao siudad.
Inbunannag na a kalibre 45 a paltog ti inusar ti suspek.
Dagus met a natiliw ti suspek kalpasan ti pammaltog babaen dagiti otoridad sakbay a makalibas.
