LAOAG CITY – Inlawlawag ni Brgy. Chairman Juanito Andres iti Brgy. Talingaan ditoy siudad ti Laoag ti maipanggep iti panakolektar ken pannakaipakni dagiti basura iti nasao a barangay.
Daytoy ket kalpasan a kinodenar ti maysa a residente iti nasao a barangay dagiti maiwar-warang a basura iti kalsada.
Segun ken ni Andres, saan a sakop ti barangay da dagiti nakita a nakawarang a basura.
Inbatad na a naurnos ti segregation wenno panagsisina dagti basura ken kolektaren daytoy dagiti garbage collector ditoy siudad ti Laoag, mamindua a daras iti maysa a bulan.
Kuna ti kapitan a gapu ta mapagsisina ti basura ket agtalinaed iti barangay da dagiti agrupsa wenno biodegradable ken maipan iti naaramid a compost pit.
Inpetteng na a saan a maiwarwarang dagiti basura gapu ta kanayun ti panagmonitor dagiti barangay officials.
Immuna iti daytoy, linawlawagan ni Andres ti akusasyon dagiti kabarangayanna na nga arig a matmaturog dagiti opisyal ti barangay gapu iti saan a dagus a pannakasolbar ti natumba a poste kabayatan ti bagyo Neneng.
Kuna ni Andres a dagus a naireport daytoy iti Ilocos Norte Electric Cooperative ken dagitoy ti nangtratrar ken masapol a naiyuray ti panagresponde ti kooperatiba.
