LAOAG CITY – Natay ti maysa a babai a napagatapan a mannamay kalpasan a pinaltugan dagiti saan a nabigbig a nakalugan ti motorsiklo wenno riding in tandem suspect iti Brgy. Boyboy iti ili ti Piddig
Nabigbig ti biktima a ni Fredalyn Agustin y Quimuyong, agtawen ti 52, balo, ken residente iti nasao a barangay.
Segun kenni Police Capt. King Ramos, hepe ti PNP Piddig, nakarekobre dagiti otoridad ti tallo a kapsula ti kalibre 45 a paltog.
Kuna na a tanamaan ti biktima iti ulo ken sumagmamano a paset ti bagi na.
Inbatad ni Ramos a basar iti impormasyon a naala da ket mapagat-atapan daytoy a mannamay.
Mamati ti hepe a posible nga adda ti sabali a rason a nangpapatayan da ti biktima malaksid a napagatapan a mannamay daytoy.
Para kenni Ramos ket nalag-an ti rason a panagad-adas na kadagiti aruy-uy dagiti pagay ti maysa pay a rason ti nangpapatayan da ngem karaman latta iti panagimbestigar da.
Iti mainaig a damag, kinumpirmaran ni Ramos, a dagus a nangiwayat da ti dragnet operation kadagiti suspek.
Inbatad na a naggapu iti daya dagiti suspek iti Sitio Nalapinanay Road ken nagturong da iti Brgy. Mangitayag iti nasao nga ili ken nagpalaud da a direksiyon.
Inbunannag ni Ramos a nakalugan dagiti suspek ti maysa a motorsiklo a nalabbaga, ken nakakipis da.
Inadmitir ni Ramos a saan laeng nga iti ili ti Sarrat ti mabalin a pagturongan dagiti suspek ngem ketdi mabalin pay iti kabangibang a lugar.
Kabayatanna, makitkita ni Barangay Chairman Braulio Benito iti Brgy. Mangitayag iti ili ti Piddig nga agad-adas ti sagibo ti pagay ti biktima iti kataltalonan idi makita na daytoy kasanguanan a mapaltugan.
Kuna na nga awan met ti ammo na a makaap-apa na ti biktima.
Innayon na nga awan ti ammo na a record na iti barangay da ken mamati a nasingpet daytoy.
Mainaig iti daytoy, kuna ni Barangay Kagawad Sherwin Corpuz iti Brgy Boyboy iti nasao nga ili a nabiit pay a nabalo ni Fredalyn Agustin gapu ta dua a bulan pay laeng a nabalo daytoy.
Awan ti ammo ni Corpuz iti kinamannamay ti biktima a maysa a makitkita nga anggulo ti pannakapaltog ti biktima a poon ti nakatayan na.
Napalaos ti panagladingit ti pamilya ni Agustin kalpasan a pinalto-paltogan ti riding in tandem suspect.
Segun kenni Monique Agustin, anak ti biktima, awan ti ammo na a rason iti panangpapatay da ti ina na gapu ta awan met dagiti nakarirriri na ken nasingpet ti ina na.
Kuna na a no siasinno dagiti mangibagbaga a mannamay ti ina na ket awan iti pammaneknek da ken awan ti ar-aramiden na a madi.
Mainaig iti daytoy, binabalaw met ti kabsat ti biktima a ni Ragsak Malteso iti pannakapapatay ti kabsat na.
Nagpanawagan a sumuko kuma dagiti suspek a nangpaltog iti kabsat na tapno maipaayan daytoy iti hustisya.
