LAOAG CITY – Kinumpirmaran ni Municipal Agriculturist Ericson Biag iti ili ti Currimao a nagreklamo dagiti 21 a mannalon ken witness iti Brgy. Lioes iti nasao nga ili.
Daytoy ket gapu ta saan pay a naawat dagiti maseknan wenno maipagarup a nailako ti 45 a sako ti abono nga inpaay gobyerno probinsyal babaen ti capitol express idi tawen 2019.
Naiturong ti reklamo dagiti maseknan iti opisina ti mayor ngem naiturong met daytoy iti Municipal Agriculture Office.
Segun kenni Biag, karugrugi pay laeng ti panagimbestigar ti opisina rason nga amuen na no siasinno ti nagpirma ken nangawat kadagiti abono para iti nasao a barangay.
Daytoy ket babaen iti pannakikoordinar na iti Sustainable and Development Center iti kapitolyo probinsyal.
Inbunannag ni Biag a babaen iti pannakikoordinar na iti SDC, nakumpirmaran nga adda ti naipaay nga abono iti nasao a barangay.
Mainaig iti daytoy, inlawlawag na a ti proseso ti pannakaibunong kadagiti abono ket babaen kadagiti opisyal ti barangay rason a ti possible a dagiti opisyal ti barangay ti nangawat kadagiti abono.
Innayon ni Biag a basar iti reklamo dagiti maseknan, itudtudo da ti kapitan iti Brgy. Lioes, nga isu ti nangawat kadagiti abono.
Inpasingked ni Biag nga ammuen da pay ti alegasyon no pudno a nailako dagiti abono.
Iti mainaig a damag, nadakamat ni Barangay Chairman Edmer Quinto iti Brgy. Lioes a napagnunumuan da kadagiti kagawad a mailako dagiti nabatbati a 11 a sako ti abono gapu iti panagtudoagtudo wenno idi nagbagyo itay tawen 2019.
Iti pannakiuman ti Bombo Radyo Laoag kenni Quinto, kuna na a naibunong met dagiti dadduma nga abono kadagiti 17 a mannalon, idinto nga ikkan da dagiti dadduma no adda ti dumawat.
Inbatad na a bassit laeng dagiti agtaltalon iti barangay da rason nakapondo laeng dagiti abono iti barangay.
Inpetteng ni Quinto nga adda ti pammaneknek ti kapitan ken mapaayaban na dagiti nakaawat ti abono kasta met iti minutes idi napagnunumuan a mailako dagiti nabatbati nga abono.
Mainaig iti daytoy, inpakaammo ni Quinto a ti naglakoan da kadagiti abono ket naigatang iti waya, 30 a silaw ken dadduma pay gapu ti kinasipnget ti barangay kalpasan a naperdi dagiti way-waya ti silaw.
Kabayatanna, sidadaan da a maidalan iti imbestigasyon mainaig ti nasao nga isyu.
