LAOAG CITY – Inpakaammo ni Barangay Chairman George Ragunjan iti Brgy. Caruan iti ili ti Pasuquin nga adda ti naawat na a text message manipud iti saan a nagpabigbig a tao seknan ti maipagarup a panagala ti pebbles iti nasao a lugar idi Sabado.
Kuna na a sakbay ti panagtignay na ket inawagan na ti atensyon dagiti pannakabagi ti linteg tapno agkakadua da a mapan iti lugar no sadinno a maipagarup nga adda dagiti agpidpidot ti pebbles.
Segun kenni Ragunjan, nakita da dagiti nabunbunton a pebbles a katukad ti markaga iti dua a 10 wheeler truck.
Patyen na nga iti tenga ti rabii agingga iti agarup alas-dos ti panagala dagiti saan a masinunuo a tattao nga agala ti pebbles.
Inbatad ni Ragunjan a gapu ta awan ti narana da iti dayta a rabii nga adda ti naawat da a text message ket inalaan na ti ladawan dagiti nabunton a pebbles.
Binallaagan na dagiti agnanaed iti nasao a lugar a saan da a gargarawen dagiti nakita da a nabunton a pebbles gapu ta possible a mairaman da nga agsungbat iti possible a reklamo a sanguen da.
Innayon ni Ragunjan a kinumpiskar da dagiti nakita da a pala ken screen a pagyukuyok.
