LAOAG CITY – Narekobre dagiti otoridad ti 18 a sachet a naglaon ti maipagarup a shabu ken maysa a rifle grenade iti kuarto ti pataengan ti subject ti operasyon iti Brgy. 1 ditoy siudad ti Laoag.
Nabigbig ti lalaki a ni Rogelio Aquino Jr y Cristobal, alyas Rap-rap.
Nailanad iti search warrant a sukimaten dagiti otoridad ti akin amianan a kuarto ni Aquino iti maikadua a kadsaaran ti pagtaengan da.
Nabirokan dagiti otoridad ti 18 a sachet a naglaon ti maipagarup a shabu iti bassit a karton ti eraphones ken ti maysa a grenade ket nabirokan iti maysa a bag a nakaparabaw iti cabinet.
Awan met ni Aquino kabayatan iti search operation itay bigat gapu ta napan iti ili ti Pagudpud.
Mainaig iti daytoy, inpetteng ti asawa ni Aquino a naimula wenno planted dagiti narekobre dagiti otoridad manipud iti kuarto da.
Daytoy ket gapu ta kelaat a pinaruar dagiti kameng ti PNP sakbay ti operasyon ken awan dagiti opisyal ti barangay.
Kuna na nga awan a pulos ti nagyan ti bag ken maikarkarga laeng ti kaurta da.
Kabayatanna, inpakaammo ni Barangay Kagawad Hassan Panaraag nga awan ti record ni Aquino iti barangay.
Naklaat ti kagawad gapu ti pannakaiwayat ti operasyon kontra ti kabarangayan na.
Kuna ni Panaraag a maysa a pintor ni Aquino.
