LAOAG CITY – Nasken nga imbestigaran ti Office of the Ombudsman ken Kamara de Representantes ti maipagarup a panagsinnukat ti text messages iti nagbaetan da Presidente Ferdinand Bongbong Marcos Jr. ken dati a Presidential Legislative Liaison Office Usec. Adrian Bersamin mainaig iti “kickbacks” manipud iti maanomalya a flood control projects.
Karit daytoy ni Gabriela Womens’ Party Representative Sarah Elago iti Office of the Ombudsman pakairamanan dagiti maseknan a komite ti Kamara de Representantes kas ti Committee on Good Government and Public Accountability.
Inpetteng ni Elago, seryoso ken saan a nasken a baybay-an ti ebidensia a mangipaneknek nga adda ti pakainaiganna ni Presidente Marcos iti kickbacks manipud iti maanomalya a flood control projects.
Innayonna a nasken daytoy a tingitingen tapno mapagsungbat dagiti adda ti nalabsingna.
