LAOAG CITY – Kalikagum ni Senior Board Member ken Chairman ti Committee on Health Dr. Medeldorf Gaoat nga ikkan ti pateg ti plantilla positions iti benneg ti salun-at.
Daytoy ket kalpasan nga inrakurak ni Mrs. Fe Siazon, ti Human Resource Officer ti Kapitolio Probinsial nga adda dagiti sumagmamano a plantilla positions ti maikkat a pakairamanan ti dua a Nurse I ti Emergency Response Office ken masuktan daytoy ti plantilla positions iti benneg ti linteg nga Attorney I ti Provincial Legal Office.
Kuna ni Dr. Gaoat a maawatanna nga agkasapulan dagiti sumagmamano nga opisina ti Gobierno Probinsial ti Ilocos Norte dagiti plantilla positions ngem maipangpangruna koma pay laeng dagiti plantilla positions nga adda pakainaiganna iti salun-at gapu iti COVID-19 pandemic.
Inbatad na a dagiti agaplikar iti Provincial Legal Office ket nasken a daytoy ket Bar Passer a saan ket di a nagturpos laeng iti abogasya ken magun-od na dagiti rumbeng a kualipikasion nga adda kenkuana.
Kabayatanna, kiniddaw ti Chairman ti Committee on Health a nayunan pay a mangala dagiti agserserbi iti benneg ti salun-at.
