LAOAG CITY – Inpakaammo ni Mrs. Perlita Cabello, ti mangidadaulo ti City Social Welfare and Development Office ditoy ciudad ti Laoag a manarimaanen ti pannakaiproseso dagiti pagganurutan para iti pannakaiyimplementar ti mendicant ordinance wenno iti Presidential Decree 1563.
Segun ken Cabello, babaen iti nasao nga ordinansa ket mamulta dagiti agpalpalama wenno agdawdawat iti kwarta ditoy ciudad pakairaman dagiti mangted kadakuada.
Inbatadna a mabalin a mamulta dagiti agpalpalama iti sangaribo a pisos idinto a dua pulo a pisos met kadagiti agited iti kwarta ngem daytoy ket manarimaan pay laeng ti panangiplastar da.
Inlawlawagna a naputar daytoy nga ordinasa ket gapu kadagiti badjao pakairamanan dagiti sumagmamano nga ubbing ditoy ciudad a maipagarop a maus-usar tapno agdawat iti kwarta.
Mainaig iti daytoy, kuna ni Cabello a makadanun payen dagitoy kadagiti nagduduma a barangay tapno dumawat ti kwarta pakairamanan iti panagpaskua uray saan pay a bolan ti disyembre.
Kabayatanna, mangnamnama a babaen iti nasao nga ordinansa ket agbuteng dagitoy nga agpalama wenno agdawat ti kwarta kadagiti tattao ditoy ciudad ti Laoag.
