LAOAG CITY – Inbutaktak ni Sang. Panlungsod Member Atty. Jason Pererra iti privilege speech na nga awan ti building permit ti maipatpatakder a Philippine Science High School iti Barangay Vira ditoy ciudad ti Laoag.
Inbatad a basar iti pannakisarita na kadagiti building officials ti proyekto ket agbalor ti 100 a milyon a pisos.
Inlawlawag na nga agarop 150 agingga iti 200 a ribo a pisos ti mapastrek kuma ti lokal a gobierno ti ciudad ti Laoag manipud iti bayad ti pannakaala amin dagiti kasapulan a pakairamanan ti permit ti nasao a pasdek.
Segun kenni Pererra, malaksid nga awan ti permit ti maipatpatakder a pasdek ket rumrumwar a ti daga a pakaipatpatakderan daytoy ket kukua ti pribado nga indibidwal.
Inpetteng na a masapol nga adda ti aksyon a maaramid seknan iti daytoy tapno maikkan met ti hustisya dagiti stakeholders ken ti lokal a gobierno kasta met ti pannakarespetar ti agtagikua iti lote.
Ibilang na a daytoy ket dakkel a problema gapo ta agarop 80 a porsiento iti proyekto ti nalpasen, ken awan ti resolusyon gapo ta agricultural land ti nakapatakderan na.
Mainaig iti daytoy, inpetteng manen ni Pererra a no awan ti maipaay a building permit ket masapol a maipasardeng kas naisaguday iti National Building Code of the Philippines.
Gapo iti daytoy, inmandar ni Vice Mayor Vicentito Lazo ti Committee on Transportation and Public Works nga agimbestigar iti maipatpatakder a pasdek ken mapaayaban iti sumaruno a sesyon.
Kabayatanna, kuna ni City Engineer Roy Tomas a sipud 2017 a pannakarugi ti pasdek ket awan ti nai-isyu a building permit ngem nagaplikar idi dagiti maseknan.
Nupay kasta, inbatad ni Tomas a gapo iti kina-pribado ti lote a pakaitakderan daytoy ket awan ti naited a building permit ken masapol a gatangen nga ummuna ti gobierno ti daga.
Innayon na a saan nga agsardeng ti proyekto gapo ta masapol ti institusyon ti ciudad ngem maihold to daytoy para iti occupancy permit.
Kabayatanna, masapol a maurnos iti kabiitan a panawen ti problema partikular ti building permit iti maipatpatakder a Philippine Science High School iti Barangay Vira ditoy ciudad ti Laoag.
Daytoy ti inbilin ni Engr. Ma. Venus Torio, district engineer iti 1st Engineering District ti Department of Publick Works and Highways (DPWH) kadagiti maseknan a personalidad iti daytoy.
Segun kennu Torio, kalpasan ti privilege speech ni Pererra iti privilege speech ken panagdamag na kadagiti engineer ken dagiti dadduma pay ket maur-urnosen dagiti dokumento.
Inbatad na a ti laeng kurangen ket ti pagbayad ti building permit ngem binagaan nan ti contractor iti proyekto.
Ummuna iti daytoy, ti ammo na ket awan ti problema gapo nadanunan na a manarimaanen ti pannakaipatakder ti pasdek.
Innayon na nga idi laeng bulan ti Hunyo ti pannakammo na nga awan ti building permit ti maipatpatakder a pagadalan.
