LAOAG CITY – Kinumpirmaran ni Barangay Chairwoman Suzzane Bueno iti Brgy. 3 ditoy siudad ti Laoag a maipatungpal ti lockdown iti sumagmamano a sitio iti barangay da intono bigat Hulyo 29, 2020.
Kuna na a malaksid iti barangay da ket adda pay ti sumagmamano a sitio iti Barangay 2 ken Barangay 4 ti mailockdown.
Segun kenni Bueno, mailockdown ti Sitio 4A, 4B, 5 ken Sitio 6 ken isuda a barangay officials, barangay health workers ken tanod ti agbantay.
Inbatad na a maiyarig iti inaramid da idi naipatungpal ti enhanced community quarantine ken adda ti maipaay a pass slip iti maysa nga household.
Immuna iti daytoy, nangiyuswat ti taripnong idi kalman kasta pay iti contact tracing ken dadduma pay a wagas kalpasan a nagpositibo ti maysa a nurse wenno ni IN-C15 itay kallabes.
Inbunannag na a nagturong ti nurse iti Sitio Uno nagpatingga iti Sitio Sais gapu ta adda ti programa ti gobyerno a panagpurga ken kadua na dagiti Barangay Health Workers idi Hulyo 21.
Kuna ni Bueno a mapatta-patta a nagduty ti nurse idi Miyekules iti center da a bukbuklen ti sangapulo a barangay rason a nakikoordinar da kadagiti maseknan.
Isumitir na dagiti traces a naala da tapno mapagtitipon amin dagitoy.
Kabayatanna, naibalakad kadagiti kabbalay ti nurse a saan da a rumwar ken possible a maidalan da tii swab test agraman dagiti nakapulapol na sakbay a nagpositibo iti COVID-19 ti maseknan.
