LAOAG CITY – Naiget a maipawil ti agiserrek ti baboy iti ili ti San Nicolas nga aggapo iti sabali a lugar.
Gapu iti daytoy, nagballaag ni Mayor Mike Hernando iti ili ti San Nicolas kadagiti umili nangruna kadagiti agparparti ti baboy a saanda nga agala ti partien da a baboy manipod iti sabali nga ili.
Inlawlawag ti mayor nga ipawil da paylaeng ti pannakaiserrek ti baboy nga aggapo iti sabali a lugar tapno malapdan ti possible a pannakaiserrek ti African Swine Fever virus iti nasao nga ili.
Inpaganetget ni Hernando nga adda ti makaumanay a supply ti baboy iti ili da isut gapuna nga awan ti rason tapno mapan paylaeng agala dagiti residente ti partien da iti ruwar iti ili ti San Nicolas.
Immunan a naduktalan ti Municipal Agriculture office ken Provincial Agriculture nga adda ti nagiserrek ti 11 a baboy iti ili ti San Nicolas no sadinno nga insigida a napilaan ti kaso ti maseknan babaen iti Agriculture Office.
