LAOAG CITY – Naminsan manen nga inriing ni Sangguniang Panlungsod Member Roger John Fariñas mainaig iti solar lights ti bypass bridge ditoy siudad ti Laoag a saan pay a nasuksuktan agpapan kadagitoy a gundaway.
Segun ken ni Fariñas, addan ti makatawen ti napalabasen sipod idi kiniddawna iti Department of Public Works and Highways iti pannakaipaay ti pundo a pannakasukat kadagiti street lights iti bypass bridge ngem awan pay ti nagbalin a tignayda.
Inbatadna a kiniddawna iti nasao nga ahensia ti gobierno a maipaayanen ti silaw iti nasao a rangtay tapno nataltalged a pagdalyasatan dagiti motorista nangruna iti rabii.
Mainaig iti daytoy, insingasing ni Vice Mayor Rey Carlos Fariñas a maikabil dagiti sodium lights a naikkat iti Gilbert Bridge ken maikabil iti bypass bridge tapno temporario a solusion iti nasao nga arungaing.
Kabayatanna, inkiddawna pay iti sekretario ti Sangguniang Panlungsod a makikoordinar iti Department of Public Works and Highways iti indasar ni Konsehal Fariñas.
