LAOAG CITY – Kinumpirmaran ni Senador Sherwin Gatchalian nga addan idiay Hong Kong ti Chinese national a ni Huang Zhiyang a maibagbaga a “boss” dagiti Philippine Offshore Gaming Operators ken maysa kadagiti maipagarop a nag-facilitate tapno makalibas ni Guo Hua Ping wenno Alice Guo iti Pilipinas.
Basar iti kaudian nga impormasyon, adda idiay Taiwan ti maipagarop a Philippine Offshore Gaming Operator boss a datin a naduktalan dagiti otoridad nga addan ti lima a pasaporte manipod iti Kitts and Nevis, Dominica, Cambodia, Cyprus ken China.
Nupay saan pay a makumpirmaran ni Gatchalian no ni Huang Zhiyang ti “bigboss” dagiti Philippine Offshore Gaming Operators, ngem sigurado a maysa daytoy kadagiti boss gapu ta rumrumuar iti incorporation papers a present ti nagan na iti POGO hubs a Sun valley iti Clark Pampanga, Baufu iti Bamban ken Lucky South 99 iti Porac, Pampanga.
Inpasigurado met ti senador a karaman ni Huang Zhiyang iti money laundering organized crime.
Kabayatanna, iti agdama ket awan pay ti impormasyon a nakalap ti senador no pudno nga adda ti opisyal manipod iti gobyerno a timmulong tapno makalibas iti pagilian ni Guo.
